揀得正矢志攻陷三班

不死鸟

先進賽馬國嘅打吡大賽通常係一級賽，不過意大利打吡今年竟然降格為二級賽，呢場褪色大戰響上個禮拜六舉行，由加盟高多芬馬房後首戰嘅Mastery奪得，呢匹出自「緬甸古廟」嘅三歲新星，響主帥戴圖理胯下輕勝，幕後已決定將矛頭直指六月上演嘅英國葉森打吡。

        響地球嘅另一邊，同樣由三歲馬做主角嘅日本一級賽NHK一哩盃，日前亦響東京競馬場圓滿結束，年僅二十歲嘅藤岡康太，策騎由中竹和也訓練嘅Jo Cappuccino爆出39倍冷門奪標，騎練首嚐一級賽冠軍滋味，隻馬亦替佢父系「曼城茶座」贏出第一場G1。

       近年香港引入唔少日本種馬嘅子嗣，個人認為最成功首推Shinko King，「善風」、「家家寶」、「紅日」、「自由好」等，睇得又打得，前駒列陣第七場，由二千縮程跑千八，亦有望取得季內第三W。第十場「家家寶」再戰贏開嘅千六，有力稔攤。至於第九場日本中央競馬會錦標，「揀得正」上仗在三班作賽亦只負頸位，今次照辦煮碗充滿鬥志，有力進而爭勝。

韋健仕澳洲交白卷

        另外，韋健仕昨日在澳洲昆士蘭東奔馬場上陣，策騎由練馬師歐伯賢訓練嘅「多樂谷」爭一級賽東奔盃，結果三甲不入，頭馬由Scenic Shot取得，而騎者同日另一坐騎Mr Baritone亦無功而還。韋健仕將於今日返港，參與下午沙田馬場賽事。力奇駿馬揀得正飛快勁。