世界漫遊:（彼德）貝蒙錦標有睇頭

不死鸟

 美國三冠大賽次關必利是錦標，馬王、馬后首度正面交鋒，結果呢場世紀大戰冇令人失望，兩匹當代王者合演一場扣人心弦嘅賽事。賽前兩個禮拜高價易主嘅準馬后Rachel Alexandra，越組挑戰同齡雄馬，響老拍檔布利來胯下沿用佢最擅長嘅快放戰略，率先殺入直路，埋門力拒改由史文夫執韁嘅應屆肯塔基打吡盟主Mine That Bird，粉碎後駒三冠王美夢。

        翻查必利是錦標一百三十四年紀錄，連Rachel Alexandra在內，先後有五匹雌馬封王，而對上一次已經係八十五年前嘅事。經當地傳媒多番追問下，馬主終於透露呢匹馬后嘅轉手費金額，原來高達一千萬美金，依家響呢場總獎金八百萬美元嘅大賽掄元，計落已值回票價。

        賽後當地人最關心係Rachel Alexandra同Mine That Bird呢對三歲王者，會唔會響三冠尾關貝蒙錦標再度對決，後駒幕後已表態希望響貝蒙園復仇﹔至於Rachel Alexandra方面就冇你咁好氣，名照報但跑唔跑就仲未落實，幕後甚至話即使依家安排退役，年尾依然大有機會當選日蝕總馬王﹗但聽練馬師艾蒙信嘅聲氣，就多數跑埋尾關，佢話安排匹馬今日返邱吉爾馬場，預計廿五號復操。