馬房秘聞:（探子）伍碧權求盡快上岸

不死鸟

▲噚朝發生咗一宗墮馬意外，助手策頭場「金不換」行到六百米彎附近被拋下，但騎者落地後已瞬即起番身，冇乜問題，而呢隻馬則走返馬匹隧道入口被捉返，人馬總算有驚無險。

        ▲伍碧權雖然早前曾經一度響練馬師榜包尾，但最近手風已經轉順，頻頻有頭馬交出，現時頭馬數字已經急升至十二場，仲爭一場頭馬就達標，暑期應該唔會收到警告信。不過，噚朝權哥仍未有鬆懈，先安排助手出試「活力驍」，其後亦吩咐鄭雨滇出試「威力高」，期間權哥全程響烽火台拎住望遠鏡睇實，今戰必定繼續搏殺。

        ▲安廐季內頭馬大部分由韋達經手，現時馬房尚欠三場頭馬達標，今次三匹戰駒「勇猛神駒」、「雪山神駒」同「萬里駒」全部交由好拍檔韋達執韁，必定會砌盡求功。而噚朝收操之後，安哥即第一時間返馬房仄齊三駒嘅食料情況，知道各駒食料正常之後，即刻放下心頭大石，睇嚟今戰應可取得頭馬進帳。

梁家俊復出必拼

        ▲早排由於哮喘而兩度退下火線嘅梁家俊，日前已響晨課恢復操馬，但剛戰仍冇上陣，旨在休息多一日。噚朝梁家俊親自替「綠色至威」及「最佳孖寶」主持最後試跑，期間呂健威同文家良均響烽火台睇實馬匹出跳過程。

        操完馬之後，梁家俊亦向練者匯報馬匹出試情況，動態相當積極，睇嚟梁家俊今戰復出必定搏盡。