7箭爭鋒意軍大爆愛爾蘭

猪拉多纳

意大利拉隊去倫敦，同愛爾蘭踢熱身賽，意軍領隊柏蘭迪利出名鍾意主攻，今次30人初步名單之中，前鋒已佔7人，旨在透過加強內部競爭，選出最佳鋒線組合去巴西。即使巴洛迪利位置亦唔穩陣，更何況卡斯辛奴、迪斯度、恩莫比尼等邊緣國腳，眾鋒將有份上陣，必定搏命數胡。愛爾蘭主帥奧尼爾剛上任冇幾耐，想盡快建立功績，豎立威信，加上喺倫敦比賽，佔半個主場之利，唔怕同對手駁火，捧大。

（TVB301周日凌晨2時45分直播）

意軍近年前鋒人選眾多，要搏命爭位，近日操練期間，柏蘭迪利用巴洛迪利夥拍卡斯辛奴攻堅，但迅速換走佢哋，柏帥話只會揀最好狀態球員入23人名單，巴洛迪利今仗絕對冇得偷懶。

奧尼爾上年11月取代查帕東尼，執教愛爾蘭，銳意改革大踢進攻足球。近兩仗熱身賽鬥塞爾維亞、土耳其，愛軍火力有明顯改善，但後防難免出現較多空位。不過以奧尼爾過去執教李斯特城、些路迪、阿士東維拉嘅成功經驗，相信唔會放棄改革。