大埔福星形勢極好

猪拉多纳

　　頭場五班1200米，「開心歡笑」今仗重返五班上陣即回配韋達，應該又到出擊時候，事關最近一次贏馬，正正就是在上季尾的相同部署。事實上，此駒季內已獲兩亞一季，同程入Q一役僅以頸位負於現評81分、將於同日列陣第十一場二班賽的「華麗登場」，可見此匹九歲馬仍有一定戰鬥力；休息接近一個月儲足體力，可望贏番場兼替李廐搶分爭上岸。

　　「龍城動力」本身退化是不爭的事實，但初落五班角逐卻不可輕視，因前仗尚於四班同程得第四，演出不俗，今強配潘頓（今季首次用洋將）兼出王牌，擺明車馬亦有爭勝之力。「巧龍」連場跑得接近，而且當中兩仗B+2欄同程均第二，足證路有專長，加強配搭用貝湯美兼排二檔好位，必是前列分子。

　　第二場五班1400米，「大埔福星」上季場場大敗，今季轉投新開倉的容天鵬即有好表現，初出跑谷草1000米排12檔得第四，再出泥地1200米第三，跟住田草1400米打開勝門。雖則其後升上四班未見再進一步，但可能是刻意部署減分，等返回五班才再拼；果然上場一落班即近，不過1600米始終長多少只得第四。今次跑番贏馬路程，用潘頓兼抽得一檔形勢大好，機會突出。「錢途有你」加眼罩後一連兩仗同程入位，配件幫到手，B+2欄亦有利其放頭跑法，三甲穩陣。(耀鈞)