C朗VS美斯射手大激鬥

猪拉多纳

兩大球王爭做世盃神射手！葡萄牙王牌基斯坦奴朗拿度同阿根廷前鋒美斯，貴為當今兩大球王，近7季喺歐聯賽場壟斷神射手席位，今屆仲有世界盃做舞台，而且今季大勇嘅射手蘇亞同迪亞高哥斯達受傷患影響，兩大球王成神射手熱門之選！

C朗喺近7屆歐聯奪得3次神射手，今屆更狂轟17球，創下歐聯新紀錄。葡萄牙今屆世盃雖則同組有隊硬嘢德國，好彩另外兩隊美國、加納實力較弱，相信唔足以阻住C朗入波。

美斯雖然喺國家隊表現不如巴塞隆拿，更被指要靠沙維同恩尼斯達先有球王級表現，但阿根廷同組對手實力唔算強，美斯應該可以搵伊朗及尼日利亞「開餐」，為做神射手打好基礎。
蘇亞雷斯 哥斯達周身傷難逞強

另一個有利C朗、美斯爭神射手殊榮嘅因素，就係烏拉圭王牌蘇亞雷斯同西班牙歸化兵迪亞高哥斯達，都受傷患困擾。「哨牙蘇」左膝半月板傷勢雖然神速康復，不過Fit唔Fit就好難講。迪亞高哥斯達亦都喺熱身賽復出，但狀態同樣成疑。呢兩位今季喺英超、西甲呼風喚雨嘅射手各有缺點，C朗、美斯兩大球王自然成為神射手嘅超級熱門，真係「唔係你死就係我亡」！