徐雨石世界盃買4串6Q

猪拉多纳

開波喇！萬眾期待嘅2014年世界盃，將會喺香港時間周五凌晨4時揭幕，騎練中有唔少足球發燒友，各有心水球隊，未開波先嚟一番牙骹戰，本地練馬師徐雨石同李易達為咗增加睇波投入感，表示會小注決賽組合同冠軍隊伍，其中前者表示睇好巴西、德國、意大利同葡萄牙，會以買馬4串6方式，投X決賽Q！
       
徐雨石

世界盃將會喺香港時間周五凌晨4時展開，首場賽事由主辦國巴西對克羅地亞，由於時差關係，相信唔少打工仔又要捱眼瞓通宵睇波。一班馬圈工作嘅員工，返工嘅時間唔係太就，但都可以較定鬧鐘，早少少起身睇埋波先；而一班練馬師亦可以一邊喺烽火台督操、一邊透過電視睇直播。
       
李易達

本地倉主徐雨石表示自己上屆世界盃投X荷蘭對葡萄牙決賽組合，可惜唔成功，今屆決定改變策略，借用買馬4串6嘅方式，挑選四隊互串投X決賽組合，分別係巴西、德國、意大利同葡萄牙。
       
李易達睇好 德國阿根廷

李易達就準備小注冠軍球隊，避免場場買之餘，亦可以增加睇波刺激感，而且一早投X咗嘅賠率亦往往較高，經考慮一輪之後，佢決定各買1,000元德國同阿根廷。
       

另捧德國場嘅尚有薛寶力，他認為德國隊近兩屆世界盃新人輩出，整體實力係32隊中最高，有望重奪失落咗24年嘅冠軍獎盃。
       
鄭雨滇：奇兵烏拉圭

正值養傷嘅鄭雨滇，可以睇世界盃消磨吓時間，佢睇好巴西、阿根廷、西班牙同烏拉圭最有機會入決賽，其中星光熠熠嘅西班牙係滇仔最喜愛球隊，而烏拉圭今屆軍容更強大，加上喺南美洲作賽，等如半個主場，有力撼低意大利同英格蘭兩支歐洲強隊，出線16強，絕對係黑馬分子。

潘頓：澳洲難踢

今屆世界盃澳洲入到32強，潘頓梗係力撐自己國家隊，不過佢認同澳洲面對西班牙同荷蘭，要出線實在太難，佢就睇好主辦國巴西喺主場捧走大力神盃。