萬事喜志切求交代

不死鸟

 呢兩日小妹先後提供「好機緣」、「好德煌」、「化工之昇」同「熊中雄」，呢幾匹心水馬全由柏寶操刀外，前三駒隔晚更被捧成大熱，唔怪得柏寶嘅騎師王賠率熱辣辣﹔不過，當然唔可以忽視韋達，佢胯下嘅「龍子」、「雪山神駒」、「勇猛神駒」同「萬里駒」都係機會分子，後兩駒亦同樣被捧成大熱，睇怕今戰都係呢兩位猛將單打獨鬥格局﹗

駿馬大師中距離惡

        第六場三班一哩，小妹最睇好「駿馬大師」，季內四場頭馬唔係贏呢程就係田草千六米，證明中距離實力好強﹔上仗呢隻馬初跑谷草二千二百米大長途，早段喺白德民胯下留後跑，末段曾交出一段唔曳嘅追勁，但可能因路程嫌長，結果終點前一百米乏力，呢次落番三班兼回師贏馬路程，形勢即時唔同晒，穩膽。

        另一方面，黃汝安目前仲差三W先達到馬會嘅發牌要求，唔使問出得嘅馬實搏盡，今晚雖然只出三駒，但隻隻都有贏馬機會，而跑谷草一六五○米最耍家嘅「勇猛神駒」一定要拖埋﹔呢匹馬最近兩仗非冠即亞，上仗初配巫斯義亦只輸半個馬位，呢次回配韋達更添信心。「好兄弟」季內曾喺湯智傑胯下輕勝同程，強配柏寶要留意。「金獅勇將」上仗冇乜走勢，但呢隻馬出名忠心，加上對手實力見晒底，抽得二檔宜兼顧。

        另一場心水係第七場三班一哩，「萬事喜」對上三仗兩度喺同程入位，每次都係輸個幾馬位未能打破悶局，但難得九歲老馬狀態仲係咁弗，加上轉投東廐後又未贏馬交代，呢次負輕磅兼排四檔有利，必定搏得就搏，坐位望贏冇難度。

        「紅皮柚」上場輸短頭位畀「玩具神話」跑第二，抽一檔有力補中，配腳首選。再揀可博均有近績支持嘅「天祿」同「世界波」。