筍盤益你:（斑尼）愛拚者勝四班着數

不死鸟

上季「愛拚者勝」初出跑田草一千米，雖然只跑第十名，但輸三個半馬位唔算太失禮﹔之後三戰得一冠兩亞，除咗本利歸還外，唔少人亦預計今季可以扶搖直上。點知「愛拚者勝」踏入五歲後，表現反而冇上季咁醒神，季內五戰只得一季，但計落又值得原諒，事關當中四仗田草賽事中，頭馬分別係「紅衣司令」、「應變計劃」、「鳥語花香」同「錢會來」，事後睇呢批馬嘅實力絕對唔嘢少，反映「愛拚者勝」喺四班有相當優勢。

        第六場嘅評分上限改為六十五分，搞到六十一分嘅「愛拚者勝」亦夠資格參戰呢場四班賽，唔使負重磅之餘，今季只跑五仗體力正強，排十檔臨場熱極有個譜，計落最啱WP捧場。

        今晚德甲煞科，榜首禾夫斯堡只要喺主場取得一分，就可以成功贏得聯賽冠軍，至於對手雲達不來梅啱啱踢完歐協盃決賽，五月三十日又要踢德國盃決賽，相信呢場未必會做攔路虎。

        但兩隊近三季九度交手，禾夫斯堡居然只得一勝三和，而對上六次喺主場迎戰雲達亦僅得兩和四負，可見主隊未必話贏就贏。既然最近一次交手禾夫斯堡大敗二比五，呢次一於再揀入球大，但要記住大細中位數係三點五球，即係加埋四粒先有錢收。