馬房秘聞:（探子）鄭廐靠成功網絡上岸

不死鸟

▲「成功網絡」馬口一向唔好，所以跑來跑去不外如是，但轉投鄭廐後副練徐貴良經常響晨課教馬，現時情況已大有改善，而且採用唔同食料之下，呢隻馬近期亦胃口大開。

        馬主噚日下晝入馬房探班，獲悉愛駒早前蹄甲曾出現小毛病，但經調理後已冇問題，馬房有決心省招牌之餘，亦希望可以憑呢隻馬贏夠十三Ｗ畢業。

        ▲「追月」今季只贏一場，其實幕後略為失望，皆因對呢匹馬期望好高。既然近三場跑三班都未能建功，所以馬房今仗立心安排呢隻馬重返四班上陣，雖然要負重磅都繼續交由韋達執韁，求勝決心明顯。

        ▲「同一世界」今季已兩捷，但幕後仍然未收夠籌，噚日馬主入馬房探班，獲悉愛駒拼後狀態仍勇，由於馬匹火氣旺盛，馬房已經申請臨場由儀仗馬陪住去閘前，希望屆時情緒放鬆啲，可以順利捧盃而回。

        ▲「白玉駿駒」來港後經常情緒緊張，而且由於腸胃欠佳，所以一直只近而未勝。不過，經過一段時間適應水土之後，問題已經得到解決，而大摩噚朝收操後返入馬房，第一件事就係餵此駒食法國草，重視之情溢於言表。馬主噚日下晝亦有入倉探班，呢隻馬今戰隨時可以打開勝門。