諾在其中:（馮諾嘉）特寶樂鎗臣大有利

不死鸟

今日馬會動用三T儲備，搞到多寶達千二萬，估計如十元一注獨中正獎，幸運兒有機會贏二千萬，咁吸引大家不妨花啲心機刨吓﹗

        賽前小妹喺專欄提供三T次關嘅「愛睦善」，原本諗住配蔡明紹減磅搏殺，可惜呢位見習生今次仲未可以披甲，最終由梁明偉冷手執個熱煎堆，雖然佢今季只得五場頭馬，但其實騎功又唔係咁差，希望可以趁機會贏番一場。

三T頭關捧加州滿意

        至於三T頭關第四場三班千二米，小妹推介用「加州滿意」做重心，呢匹三歲馬至今跑三仗非勝即位，首兩仗跑田草一千米，末段均交出快時間輕鬆掄元，上仗增程跑千二米，差啲經驗下未能一放到底，喺終點前被「六六精英」、「祖國繁榮」趕過跑第三，對於一匹質新馬嚟講，表現已及格有餘。試準後今次再戰同程，強配柏寶兼有一檔之利，力足收復失地。

        配腳方面，「特綵」在港六戰得一冠兩亞一季，上仗原本報爭千四米賽事，但因右前腳有事退出﹔休戰一個月後再跑曾上名嘅千二米，有力威脅。「六六精英」上仗以鼻位壓倒「祖國繁榮」贏馬，田草千二米兩戰全勝夠首本，路合要拖。冷腳可博「藍老虎」，負磅輕兼曾勝同程，有二檔之利隨時跑近。「美妙選擇」上年十月輕鬆贏馬後，一直到今日先上陣，相信健康曾出現問題，呢次負重磅兼抽十二檔，加上有「加州滿意」等放頭馬同場，佢要貼欄跟前走唔係易事，只宜留意走勢。

        另一場心水係第九場三班千六米，「特寶樂」近兩仗非冠即亞，既然上仗贏谷草一六五○米嘅姿態相當輕鬆，回師沙田闊場仲啱追趕，一於做膽。配腳拖「鎗臣」、「紅日」同「大有利」。