尼馬有望超越大細哨

猪拉多纳

巴西一如外界賽前所料，順利以小組首名晉級世界盃16強，尼馬愈來愈有睇頭，唔只因為又入兩球，更重要係從整體能力、信心都比一年前有明顯提升，更有大將風範。呢位射手年僅22歲，仲有進步空間，成就超越朗拿度、朗拿甸奴等森巴名將，可以話係指日可待。

一年之前，尼馬畀人嘅印象係花拳秀腿，好扭得，但唔實際。不過依家佢已成為巴西靈魂人物，傳射能力都有好大進步，而且鬥心十足，好有球星光芒。事實上，現時呢隊巴西以工兵型球員為主，好需要尼馬呢種可以憑一己之力，改變戰局嘅「神奇小子」。佢自知責任重大，亦特別落力，性格成熟咗唔少，如果可以幫巴西捧世界盃冠軍，相信佢都有力問鼎國際足協金球獎。
洛賓關鍵荷蘭前途

巴西16強鬥智利，應該可以格食格，剋制對手，加上有主場之利，爭標前景樂觀。另外，荷蘭快翼洛賓今屆表現亦好出色，帶動整支球隊進攻，間接幫尹佩斯翻生。尹佩斯上仗對智利停賽，洛賓展示出領袖風範，尤其係荷蘭第二個入球，佢長驅直進，妙傳隊友建功，盡顯核心作用。荷蘭今屆可以打到邊個階段，洛賓嘅演出屬於最關鍵因素。