筍盤益你:（斑尼）風馳電掣磅輕惡

不死鸟

行船跑馬三分險，如果仲要喺雨中作賽，不論人馬自然有一定風險，所以唔怪得有啲騎師會特別錫身，胯下坐騎隨時走樣﹔相反，部分騎師喺陣上則好似要錢唔要命咁款，做馬迷自然樂意捧場。好似剛戰潘頓起孖，尤其策「威武雄獅」嗰種拼勁更相當令人欣賞，今戰佢騎七駒隨時又有機會起孖。

        三戰全勝嘅「孫子奇兵」聽晚繼續由潘頓披甲，計表現直落贏四場唔係難事，但名氣馬必定冇賠率，反而第六場三班一六五○米嘅「風馳電掣」，由於同場各駒實力平均，預計呢匹五歲馬會有分頭，咁就更值得捧場。

        「風馳電掣」在港十五戰只得一捷，但當中有十一次跑入前五名，就知佢屬於表現平穩一族，而近三仗跑泥地賽得一席季軍及兩席第五，成績及格但表現唔算突出，呢次幕後終於安排回師草地賽，睇怕已到出擊時候。翻查紀錄，上季「風馳電掣」跑至第四仗時出爭谷草一哩，一匹從未跑過谷草兼增程嘅質新馬，臨場居然捧成大熱，就知有人睇好佢實適應跑窄場，結果喺薄奇能胯下輸短頭跑第二。最近一次跑同程時，「風馳電掣」亦只以頸位落後頭馬「勇猛神駒」得殿軍，既然後駒上周再贏同程，呢場「風馳電掣」喺三班負一一九磅冇理由唔夠爭，宜優先留意。

       今晚足智彩只得一場獨腳戲上演，而呢場瑞超由佐加頓斯主場鬥赫根，主隊連敗四場後，今次嘅賠率仲係較熱嗰隊，到底係咪已到反彈時候﹖

捧赫根讓球客勝

        記得上次佐加頓斯作客鬥特利堡，計往績兩隊一向大手交易，但馬會卻將入球細嘅賠率壓得好低，斑尼以為操盤手畀貼士，結果佐加頓斯啱啱輸○比三開大。睇翻今次嘅主客和初盤，主隊近績極曳兼連續三仗冇波入，客隊則三連勝兼上仗作客大炒希爾星堡三比○，不過讓球初盤係主隊讓平手半球，買赫根似乎相當着數，到底呢個係筍盤抑或係投注陷阱﹖但主隊表現太差實在買唔落手，一於買讓球客勝，至少打和亦有錢收。