勝哥兒部署精妙

猪拉多纳

　　煞科大戰今日在沙田馬場上演，全世界都凝神注視老蔡與小方，前者遣馬十一匹，後者派十二駒迎敵，單睇兩倉賽前殺氣騰騰，較諸部署大賽更肉緊。值得留意尾場賽事，老蔡四路興兵氣勢盛，未跑經已先聲奪人，尤其是「魚躍鳥飛」新勝猶勇，今強配雷神兼排靚檔，再捷呼聲高唱入雲。

　　但話時話，小方的對抗策略真夠巧妙，同場派遣「勝哥兒」上陣，115分馬掛頭牌，今仗重負131磅，或會影響爭勝機會，但能令「魚躍鳥飛」蝕分比賽，這誠是一大成就。

　　若以馬講馬，「勝哥兒」乃級際賽常客，今降格出戰普通一班賽，卡士鶴立雞群，今改配何澤堯更有2磅優惠，相對「魚躍鳥飛」本身已要蝕分，雷神操刀另再超重2磅，雙重蝕底下，形勢對「勝哥兒」極為有利。跑馬除了講實力，練馬師的部署更要食腦，小方正是有腦之人。

　　至於第四場四班1200米的「乖乖寶貝」，上仗走勢極出色，沿途望空走四之餘，頭兩段更造出頗快步速，埋門居然未腳軟兼且保住Q腳，絕非尋常四班馬所能辦到。今場蔡「明多多」是機會馬之一，小方一定擒之而後快，「乖乖寶貝」無論計本身實力抑或鬥志，都大可放心捧場。