計得精明:（張沖）京城天寶佔地利人和

不死鸟

 季尾揀馬時，筆者覺得有三類馬匹會有較大優勢，第一是休出體力足之馬，牠們可以憑對手體力下降而佔到甜頭，其次是在實戰中操起狀態的慢熱馬，季尾階段已踏入收成期，第三類是佔地利之馬，由於賽期頻密，草地跑道損耗極大，加上臨場隨時有雨，故此擅跑變化地之馬便要睇高一線。馬迷投注時不妨根據上述條件揀馬，或會有意想不到收穫。

       第一場五班千八米，「京城天寶」較為慢熱，要多跑才會上力，上季尾由徐雨石接手之後，一出即在五班賽掄元，當時評三十五分贏谷草同程，且賽事在雨中進行，場地掛牌是軟地，全晚並冇一駒能後追贏馬，但牠卻可以在近乎冇可能的位置一衝而上奠定勝局，可見跑變化地的能力絕對不簡單。上仗「京城天寶」出爭谷草二千二百米，在薛順強胯下殺入一席冷位置，證明狀態已操起，易配手風正順兼擅打水戰的潘頓，可望重開勝門。

        「尊係贏」前季尾曾打叠兩仗跑入前兩名，十歲老馬競賽生涯已踏入倒數階段，如場地變化威力更強，冇保留之馬必盡拼求勝。「尖子」亦是變化地能手，霍利時馬房今晚大軍壓境，不可不防。「常盈」加頭罩後兩戰全上名，四歲馬有力介入一戰。