墨超智甲熱辣開騷

猪拉多纳

高路高路加火猛炒

適逢今年係智利足總成立119周年，曾三十次贏得聯賽冠軍、貴為全國最受球迷歡迎嘅首都老牌勁旅高路高路，自然希望藉此大日子成功衞冕甲組冠軍。不過，另外兩支首都嘅「大學」球隊智利大學及天主教大學亦對錦標虎視眈眈，睇嚟今個春季聯賽冠軍都離不開「首都三雄」。今次科娜就同大家講吓揭幕戰聖馬高斯主場迎戰高路高路，兩軍實力有極大差距，高路高路今場客勝可以話係冇難度！

（周日凌晨零時30分開賽）

要講智甲，就一定不得不提高路高路，呢支老牌勁旅喺智利地位超然，係國內足球嘅先鋒，貴為上季秋季聯賽盟主，為求成功在智利甲組聯賽第三十一次封王，特意向英冠韋根收購國家隊中場包爾斯亞，以及由巴甲哥連泰斯搵嚟前國家隊中場馬當拿度回巢，配合中場富恩沙利達及上季榮膺秋季聯賽神射手嘅前鋒艾斯迪賓柏利迪斯，務求以最強陣容力圖蟬聯錦標。
作客照數聖馬高斯

咪以為升班嘅聖馬高斯主場出戰就有機會偷雞，高路高路上季能夠成為秋季聯賽王者，全靠作客成績優異，八場作客取得七勝一和，所以今場客勝應該冇走雞。若然大家嫌客勝冇肉食，不妨買多注入球大，皆因高路高路亦係「火力王」，上季十七戰取得四十五個入球，入球能力超強，大盤唔怕追！