利昂爭3連霸要問過阿美利加

猪拉多纳

Big4激鬥 美洲熱Non Stop

美洲隊伍喺巴西世盃大放光芒，當中墨西哥同智利嘅演出，令球迷留下深刻印象。世盃已經結束，但呢股美洲狂熱依然Non Stop，新季墨西哥超級聯賽今朝開鑼，CF阿美利加、藍十字同托盧卡將會出盡渾身解數爭標，力阻利昂完成3連霸壯舉，呢場「新Big4大激鬥」實好睇過戲！

墨超新貴利昂近兩季呼風喚雨，全隊上下今季只有一個目標，就係要成為1996年改行短賽季之後嘅首支3連冠隊伍。會方季前盡最大努力保留荷西華斯基斯、彭拿同蒙特斯幾位主力，加上有墨西哥隊長馬基斯鎮守防線，擺明要締造「Tri-Campeon（3連冠）」壯舉！
破轉會費紀錄 柏拉達投阿美利加

不過利昂要奪標，先要問過CF阿美利加，呢支墨超傳統勁旅係今季轉會市場嘅主角，佢哋以破墨超聯賽紀錄嘅1,000萬美元，羅致拿根亞射手奧利比柏拉達。呢位30歲前鋒喺巴西世盃力壓查維亞靴南迪斯擔正，對喀麥隆場分組賽更一箭定江山，阿美利加有埋呢位「墨國最貴球員」肯定如虎添翼。

至於簽入法蘭斯高洛迪古斯嘅藍十字，則希望打破17年聯賽錦標荒；擁有巴拉圭守將保羅達施華壓陣嘅托盧卡亦有能力左右大局。聽朝兩大爭標分子利昂同CF阿美利加就會正面交鋒，利昂話晒人腳變得少，球員之間夠晒默契，首戰料可喺主場旗開得勝。

（開賽時間：周日早上9:06）