馬房秘聞（探子）:梁家俊充當龍武軍

不死鸟

▲葉楚航今戰有三駒交予梁家俊執韁，所以噚朝相當緊張，一早買定早餐請梁家俊食，順便講解各駒嘅特性，收操後亦叫咗俊仔入馬房寫字樓，翻睇呢三駒近仗錄影帶。其後「龍武軍」馬主響下晝入馬房探班，葉楚航亦叫埋俊仔一齊去，馬房已為呢隻馬申請聽朝坐雙格車過海，等馬匹情緒唔會咁緊張，搏殺起上嚟自然更得心應手喇﹗

　　▲噚朝呂健威一見到韋達，即響烽火台內密斟，傾談內容當然係圍繞第五場隻「財富之星」，呢隻馬今季屢拼未勝仍獲得韋達垂青，背後自然有原因。原來馬房近兩星期已開始替「財富之星」加料催谷，響食料內加入金山大麥，而馬匹近期亦已谷到火噴噴。據講馬主聽晚會入場督戰，替愛駒打氣之餘兼希望可以拉頭馬。

　　▲白德民雖然響遮打盃揀錯馬，但噚朝晨課仍然相當積極，心情未見低落。

 　　聽晚白德民將會騎三匹伍廐馬上陣，噚朝騎者在處理完摩廐事務兼見過大摩之後，即第一時間去搵伍碧權，商議頭場「眼鏡之寶」、第四場「大勇」同第五場「好利高」嘅作戰大計。其後白德民更跟伍碧權入倉睇各駒食料情況，可見呢路人馬今戰滿肚密圈，必定連場搏殺。