見招拆招（精叻仔）:年年開心①攻而破

不死鸟

唔經唔覺已經跑到季尾，上周三筆者已經留意到快活谷馬場嘅跑道情況有變，馬匹入直路後走外欄場地明顯較為蝕底，皆因響接近外欄一帶嘅草地跑道，已經有點光頭現象，呢個情況響電視上真係未必可以睇到，加上今次採用C欄作賽，相信會對內檔馬更加有利。

　　第二場五班一哩，「年年開心」上仗出爭同程跑第二，僅以頸位輸畀今次又同場嘅「龍子」，睇番當晚「年年開心」讓後駒七磅，依家相隔兩周後再碰頭，只需要讓對手兩磅，單計磅位已有反先之力。

　　最重要係「年年開心」今次抽得一檔起步，估計出閘後可以輕鬆貼欄守好位，有望全程響有利場地上競逐，反而「龍子」排四檔始終有機會被頂出外叠，所以計落都係要捧「年年開心」，即管睇吓呢隻馬能否取得久違嘅頭馬。

　　第七場三班千二米，葉廐「連利福星」上仗響柏寶胯下險勝同程，由於終點前一步先剛剛趕過「金鑽龍華」，所以賽後只被評磅員輕手加五分。

　　今次葉楚航幫「連利福星」報爭評分區域上限為八十五分嘅三班賽，令呢隻馬同上仗一樣只負一二三磅，毋須加磅出賽，形勢可以話相當有利。同系嘅「連利精英」剛於周日搏失，輸畀「締造美麗」跑第二，今次「連利福星」接棒上陣，可以話係不容再失。