開鑼戰布力般卡城鬥大

猪拉多纳

英冠揭開序幕，開咧戰由布力般流浪主場對卡迪夫城，上季「卡城」畀班主陳志遠搞到滿「城」風雨，最尾衰到喺英超排包尾降班，今夏「卡城」矢志捲土重來，主帥蘇斯克查話希望跟隨恩師費格遜，將進攻足球理念注入「卡城」，帶領球隊升班，睇番「卡城」近排熱身賽，踢法果然係主攻，今場大盤博得過！

（TVB 301周六凌晨2時45分直播）

卡迪夫城上季喺英超攻力疲弱，38場只入得32球，所以領隊蘇斯克查今夏買人主要以攻擊球員為主，例如買入雷丁神射手方祖、華拉度列前鋒查維亞古艾拿，以及成名已久、但喺曼聯苦無出場機會嘅馬捷達，加埋原有前鋒堅韋尼鍾斯、祖美臣，前線真係勁多人，「蘇B」要踢進攻足球應該冇問題。不過最大問題係「卡城」喺中堅哥爾卡離隊轉投昆士柏流浪後都冇補番一兩個後衞，防守力嚴重削弱，所以近6場熱身賽有5場開大盤，認真係有前冇後。
「蘇B」喪買前鋒火力猛

布力般流浪今夏最重要嘅「收購」一定係射手佐敦洛迪斯留隊續約至2019年，呢位24歲主力上季幫布力般射入25球，受到好多球會青睞，布力般能夠留得住佢，絕對係一大喜訊，此外布力般分別簽入前鋒基斯布朗及可翼可鋒嘅華尼，將大大加強球隊攻力，今場同「卡城」鬥攻都冇有怕！