葉士域治 富咸攜手做細界

猪拉多纳

英冠今晚夠晒熱鬧，葉士域治主場對富咸，1.7倍入球細抵玩。今季葉士域治幾乎零轉會費增兵，實力同上季冇咩分別，對家富咸降班後玩大換血，但成班新球員中，只得上季英冠射手羅斯麥哥馬克有戰鬥力，唔似開到入球騷囉！

（TVB301周日凌晨0:15直播）

葉士域治上季以第9名過終點，淨係睇佢哋嘅轉會買賣，已經知道高層冇咩要求，雖然佢哋主要得後衞艾朗加斯威爾離隊，不過新簽入嘅多蒙特前鋒巴查拿、曼城中場漢素爾、侯城中場甘馬倫史超活同水晶宮後衞莊拿芬柏亞全部唔使錢，只得諾士郡門將比爾高斯基要用錢買，咁嘅陣容，難聽講句都係等收咧格局。
馬加夫大換血簽英冠射手

富咸降班後繼續由馬加夫執教，佢向來鍾意玩大換血，組軍方式好似打機咁隨意，不過佢踢走咁多球員，最賣得錢得中場迪查加，價值500萬鎊，所以富咸簽嘅新球員，大部分都唔使錢，而且得轉會費1,100萬鎊（約1.43億港元）嘅列斯聯射手羅斯麥哥馬克擺得上枱面，用咁多主力換1個前鋒，季初睇怕都要時間夾下至撻得着。

雖然羅斯麥哥馬克上季有28個聯賽入球，成為英冠神射手，但就算佢係葉問，可以1個打10個，都好難當葉士域治後防係茄喱啡咁打喎，因為對家上季頭12場主場聯賽，只得2場失多過1球，今季佢哋陣容冇乜大變，羅斯麥哥馬克又同隊友未夾熟，要保住清白絕對唔難。假如大家冇特別心水，就玩入球細啦！