阿仙奴曼城搶頭彩

猪拉多纳

英超開鑼前矚目大戰

作為英超開鑼前哨戰嘅英格蘭社區盾今晚喺溫布萊球場爆發，由上屆足總盃盟主阿仙奴挑戰聯賽冠軍「藍月亮」曼城，亦為嚟緊新一季英超揭開序幕。由於雙方關係一向麻麻，故即使社區盾並唔係乜嘢重要嘅錦標，兩隊仍然好想喺新球季打響頭炮壯聲威，兼挫死對頭銳氣，爭勝欲望毋庸置疑，斯維就覺得今仗勝負難料，倒不如穩陣啲要入球大。

（now 621及632周日晚10時直播）
缺德國三星 A山孭飛

曼城近年高薪挖走阿仙奴球員已成習慣，今夏兩大叛徒拿斯尼同基捷基治就落足嘴頭，氹掂沙格拿棄「廠」入「城」，進一步加深兩軍嘅仇恨。好彩阿仙奴還清晒酋長球場債務後，唔使再咁慳家，繼上年高價買入奧斯爾後，今夏又以3,500萬鎊羅致巴塞前鋒阿歷斯山齊士（A山），暫時成為今夏英超標王，過往佢喺巴塞因有球王美斯而被迫做綠葉，依家嚟到阿仙奴仲唔做番大佬咩？呢位智利球星可鋒可翼速度快，社區盾係佢首場為新東家參加嘅正式賽事，梗係要火力全開騷哥利啦！

不過，阿仙奴隊長華美倫即將被賣走，為德國勇奪世盃嘅梅迪薩卡、中場奧斯爾同前鋒普多斯基仲未歸隊，估計新簽入嘅守將哥林張伯斯同迪保治都會正選披甲，與隊友未夾熟，後防唔慌穩陣，估計兵工廠多數會以攻代守，以減輕後防嘅壓力。
收起8主力 防線穿窿

另一邊廂，曼城由於陣中有多名世盃國腳啱啱歸隊，主帥比歷連尼講到明今仗有8名球員唔會上陣，唔單止射手阿古路同借將林柏特，連後防主力高柏尼、薩巴列達、迪米捷利斯及硬朗防中費蘭甸奴統統都冇份。曼城早前熱身賽場場有失波，反映出佢哋條防線唔好得阿仙奴幾多。

好彩「黑山小妖」祖維迪弗到震，呢位上季「第4前鋒」近期頻頻有士哥，難得阿古路同尼格度缺陣，又遇上阿仙奴新埋班防線，梗係要入多幾粒氹比帥啦！加上社區盾只係季前熱身錦標，奪標意頭大過實質榮譽，球隊喺冇心理壓力下都會踢得好開放，開大盤比率相當高。
領隊Chit Chat

雲格(阿仙奴領隊)：我當然想強勢開局，社區盾正係一個難得機會畀我哋睇吓自從贏得足總盃後有幾大進步，雖然球員體能未弗，但我哋會全力爭勝。

比歷連尼(曼城領隊)：社區盾絕非友誼賽，對阿仙奴係一場重要戰役，預計今仗會好精彩，我哋今季目標依然係4線爭冠，但都希望贏埋社區盾開個靚頭。