些路迪態沉聯賽首騷捱細界

猪拉多纳

蘇超開咧冇耐即刻開快車，傳統班霸些路迪今晚先至首度登場作客聖莊士東。雖然「綠白軍」喺國內一向打橫行，但功勳領隊連儂走人後成隊立立亂，歐聯可以晉級都只係靠對手出錯人犯規所致，班波完全未上力，遇上死守頑抗嘅聖莊士東，些軍只求贏波算數，客Ｗ太熱冇肉食，轉玩細盤好過。

（TVB 302周四凌晨2時45分直播）

自從死敵格拉斯哥流浪降班後，每年蘇超得番邊隊攞亞軍及降班兩大懸念，因為「綠白軍」些路迪實力大超班，主帥兼名宿連儂又領導有方，難怪輕輕鬆鬆取得三連冠。可惜連儂唔甘心只做山寨王，今夏決定離隊搵新挑戰，些路迪搵嚟朗尼迪拿頂替，呢位教頭只曾帶領史卓加斯特奪得上季挪超冠軍，喺蘇格蘭冇乜江湖地位，早前喺歐聯外圍賽第3圈對住波蘭球隊歷基亞，兩回合慘輸六個一皮，肉酸到暈，若非對手派出停賽球員而被判罰次回合輸0比3，「綠白軍」都不能憑一個作客入球躋身附加賽，真係大話夾好彩。
眾將心繫歐聯附加賽

雖然些路迪今晚喺聯賽首度出擊，但眾將心思已經飛晒去下周中歐聯附加賽首回合作客馬里博爾，佢哋剛從阿士東維拉借得保加利亞小將阿歷山大當尼夫，不過神級鋼門費沙科士打啱啱又過檔「聖人」修咸頓，中場核心兼隊長史葛布朗仲養緊傷，對進攻組織影響極大，況且成班波喺歐聯畀人打到三魂唔見七魄，撞正遇強必「泊大巴」嘅聖莊士東，近況曳爆嘅「綠白軍」唔係話炒就炒。對於帥位未坐暖嘅朗尼迪拿嚟講，最緊要係贏波擸晒三分吊命，客Ｗ得1.34倍太乏味，讓球客勝唔多穩陣，反而入球細有2.05倍更值博。