斯巴達撻着圍剿卡斯洛達

猪拉多纳

俗語有話寧買當頭起，俄超勁旅莫斯科斯巴達一開咧即撻着，連贏兩大勁敵魯賓卡山同莫斯科戴拿模，箭頭迪斯奧巴弗到勒都勒唔住，今晚聯賽作客卡斯洛達，後者「巴西進攻鐵三角」冇料到，2.6倍客勝揀得過！

（now670台周五凌晨1:00直播）
主隊「森巴兵」冇料到

卡斯洛達前線靠杜卡莫、阿里同祖奧仙奴幾件巴西兵搵食，弊在呢個進攻鐵三角喺歐霸盃就也文也武，返到俄超就靜到冇譜，搞到隊波連和兩場，連續兩季成為球隊首席射手嘅杜卡莫仲要衰到未開齋，全隊得祖奧仙奴入過球12碼咁大把，加上中場兩大猛將阿美度夫同馬馬耶夫養傷，中前場曳到咁，即使主場出戰，睇怕都係捱打居多。
射手迪斯奧巴弗爆

另邊廂，莫斯科斯巴達射手迪斯奧巴弗到漏，連續兩場聯賽梅開二度，等閒後衞都幾難阻佢搵食。至於上場聯賽受傷被調走嘅中堅保捷迪，賽後證實虛驚一場，今場繼續扼守中路，斯巴達可謂攻守兼備。

再者斯巴達上季3場由球證伊雲諾夫主吹嘅比賽，最後全部贏晒，今晚有埋呢位「福星判官」幫手，客勝手到拿來啦！