冠軍騎師未必受歡迎

不死鸟

韋達目前以95Ｗ對73Ｗ的柏寶，相差22場，柏寶要追都幾難。唔知係唔係韋達已知道贏梗騎師冠軍寶座，近期幾次賽事陣上表現令捧佢場的Fans可謂大失所望，就以5月21日谷草夜戰第8場為例，他策騎黃汝安馬房「萬里駒」為2.8倍大熱門，之前兩次他替「萬里駒」贏馬係留住鬥拉士，怎不知該役竟然在前800米，將「萬里駒」同「鑽飾光芒」鬥燒，開出46秒3偏快步速，原來他為蔡神仙「玉峽生輝」造步速，以「玉峽生輝」目前腳法屬中距離方合，但此仗縮程跑1200米可以後上殺敵，就係多得韋達在前800米，開出46.3扯快步速，咁樣先可以造就「玉峽生輝」贏馬，而「玉峽生輝」入閘時紅燈後由7倍打到得5倍，你話有關人等係唔早已洞悉先機呢？
香港賽馬會於6月1日公布本年度「最受歡迎騎師」選舉名單，而近期馬會公布公眾馬迷踴躍投票。在馬會網站收到的選票中，柏寶暫時領先。截至6月5日中午12時，單計網站所收到的選票，「最受歡迎騎師」柏寶得票率為37%，暫居首位；韋達居次，得票率為22%；見習騎師蔡明紹以21%得票率緊隨韋達之後，由此可見公眾馬迷眼睛是雪亮的，縱使你韋達當上今屆騎師冠軍寶座，但一樣不被公眾馬迷認同你是最受歡迎騎師。