里爾前鋒着火射瓜波圖

猪拉多纳

今晚有多場歐聯外圍賽附加賽首回合上演，度士睇中法甲里爾主場對葡超波圖一仗。里爾今夏球員變動不大，球隊整體默契得以保持；相反波圖有唔少主將離隊，球隊同時買入好多新球員，相信要經過一段時間磨合先能夠發揮水準，今仗作客絕對唔易踢，度士睇好主場嘅里爾可以先拔頭籌，平手盤捧主隊。

（有線61及201台周四凌晨2時45分直播）

里爾今夏離隊球員唔多，最出名就係於世盃打響名堂嘅比利時前鋒奧歷治，呢位19歲前鋒最終畀英超利物浦買咗，但好彩紅軍將佢借番畀里爾一季，所以對里爾嚟講絕對係好事。里爾上仗聯賽就憑奧歷治射入12碼擊敗對手打開勝門，可見呢位小將對球隊非常重要，有佢上陣肯定大大增加里爾今仗贏波嘅機會。
波圖兵帥俱新未執掂

波圖今夏有多名球員離隊，較出名係已轉投曼城嘅後衞文加拉及中場費蘭度法蘭斯高，而主帥一職亦由前西班牙U21教練洛佩特吉接任。洛佩特吉亦搵咗唔少同胞加盟，好似前馬體會前鋒阿祖安盧比斯及前巴塞翼鋒基斯甸泰路等，但呢班新球員需要時間磨合，今仗面對實力唔弱嘅里爾，作客唔會咁易攞到甜頭，度士睇好主場嘅里爾可以先下一城，平手盤捧主隊。