恒大跌Watt未夾熟捧半和

猪拉多纳

亞冠盃今晚續演8強首回合激戰，廣州恒大（足智彩譯FC廣州）客場挑戰澳職包尾大幡西悉尼流浪者，表面睇恒大人腳勝一籌，但佢哋今季成班波沉晒，去到人哋地頭未必話贏就贏，博2.15倍「半和」好過。

（now 670台周三下午5:30直播）
中超贏得吃力鄭智坐波監

走咗孔卡、穆里奇兩件巴西兵，雖然補番迪亞文迪、基拿甸奴呢啲過氣意大利國腳，但恒大似乎仲未搞好隊形同默契，中場控制能力唔及以前，近兩場中超都贏得好吃力，明顯經過世盃休戰期，班球員狀態下滑，今晚仲要有鄭智坐波監，畀唔到人必勝把握。

西悉尼都問題唔少，主帥普波域盛傳畀英超水晶宮挖緊佢回巢，小野伸二、靴斯、阿倫爾、普蘭斯幾件主將都轉咗會，新簽返嚟嘅前荷蘭國家隊快翼卡斯迪倫又傷咗，後防老大哥史柏拉洛域亦打埋柴，睇怕會疊埋心水死守，捱到45分鐘唔輸真係唔奇。