布魯士有料侯城嗒得杯「洛」

猪拉多纳

今晚歐霸盃附加賽首回合由英超球隊侯城作客比利時嘅洛格倫，呢隻「老虎」喺主帥布魯士麾下表現對辦，連續7場未輸過。依家仲話要買射手添火力，擺明想喺歐霸盃有一番作為，今仗作客照讓平半，梗係撐2.1倍上盤。

（開賽時間：周五凌晨2:30）

呢度真係要讚吓布魯士，侯城因為參戰歐霸盃提早開季，佢好快就調整到班波嘅狀態，計埋熱身賽開季至今7仗不敗。上仗英超首戰亦作客順利擊敗昆士柏流浪1:0全取3分，就算中場辛迪加斯休戰，個勢咁好都值得秤先。

呢位領隊搞轉會又有一手，今年1月來投嘅前鋒沙恩朗早前以接近當初雙倍價錢、約1,200萬鎊（約1.9億港元）賣去修咸頓，只係半年就賺咗筆。布魯士經已鎖定喀麥隆射手阿布巴卡做目標，一眾鋒將謝拉域、恩歷克沙保收到風今晚邊敢唔交足功課先？
洛格倫前線冇人孭飛

洛格倫聯賽4戰錄得2勝1和1負，表現係唔曳，但自從上季首席射手夏巴奧爾離隊後，前線冇人孭到飛，無論派出咩組合都破門乏力。單靠中後場球員幫手食胡喺比甲就得啫，出嚟踢歐霸盃梗係危啦。