摩納哥喪攻求響勝鼓

猪拉多纳

食粥食飯睇「老虎」貝碧托夫

上季法甲二哥摩納哥認真坎坷！呢隊法甲勁旅開季居然脫腳頭兩場輸晒，暫時喺聯賽包尾，佢哋今場作客鬥實力一般嘅南特，期望一對箭頭法卡奧同貝碧托夫生生猛猛，一班後防生生性性，合力踢番場爭氣波敲響勝鼓。

（TVB302周一凌晨3:00直播）

世界盃金靴獎得主占士洛迪古斯今夏離開摩納哥，搞到呢班波中場冇咗靈魂成隊走晒樣，睇勻摩納哥全隊，又真係冇乜邊個可以代替「占士仔」嘅地位。好在摩納哥鋒線依然銳利，法卡奧話走講咗幾個月都走唔成，姑勿論如何，佢拍住貝碧托夫攻堅火力真係唔講得笑。就算「老虎」狀態未去到100%，以佢嘅卡士喺法甲都絕對夠殺啦！

不過由上季講到今季，其實摩納哥防線差先至係死穴，會方今夏喺轉會市場擸走超過7,000萬歐元，荷包腫脹但依然冇對症下藥買番幾件夠卡士嘅守將，新教練查甸繼續漠視老人防線弊病，艾比度走咗就靠晒另一個老將卡維奴，結果開咧戰1:2輸畀羅連安特，就係「多得」佢兩黃一紅被逐，第2場防線由艾登路亞拍拉治仲弊，頂唔住波爾多嘅快速踢法大敗1:4，頭兩戰3度被罰12碼係摩納哥最大致命傷，今場鬥南特真係要諗吓計仔先掂。
南特主力他投鋒力削弱

主隊南特開季兩戰分別砌低朗斯同賽和梅斯，對手都係升班球隊所以未見真章，不過佢哋季前有首席射手佐積域轉投拉素，鋒力明顯受損。上季佢哋兩度同摩納哥交手，分別輸0:1同埋1:3，摩納哥就算防守唔掂，前線班球員都肯定會搏命喪攻力求砌低南特開齋，以兩軍人腳上嘅差距，後者想搶1分都唔係易事。