阿仙奴搶錢大爆發

猪拉多纳

爭入分組賽金礦 喪攻比錫達斯

傳說，阿仙奴有位「爭前四狂魔」雲格，年年都攞到歐聯席位，事實上，雲格更係「歐聯分組賽狂魔」，阿仙奴喺佢帶領下，已經連續16年殺入歐聯分組賽，雖然今屆歐聯附加賽首回合作客比錫達斯飽食驚風散，但「兵工廠」總算能夠打和0比0，今場次回合返到酋長球場，「狂魔」雲格又再出動，為爭「錢」途無限嘅分組賽資格，實會下令班「廠員」全力搶攻，大盤值捧。

（有線61及201台周四凌晨2時45分直播）

阿仙奴呢隊波好得意，雖然多年嚟都極難爭英超，不過就年年都入到歐聯分組賽，然後又經常都喺16強出局，不過如果唔係年年都入到歐聯袋晒分組賽啲收益，「兵工廠」又點可以還清興建酋長球場啲債呀？所以阿仙奴每到呢啲搵錢嘅重要關頭，往往都會突然爆發，以行雲流水嘅攻勢攻到對手有氣冇碇抖。

「兵工廠」今場雖然有「死神」艾朗藍斯坐波監，隊長阿迪達、前鋒基奧特因傷缺陣，其中基奧特足踝骨折可能要抖3個月，不過阿仙奴最大嘅優勢就係中場多的是，奧斯爾、韋舒亞、辛迪卡索拉、阿歷士張伯倫、路斯基等，真係講極都未講完呀，得中場得天下，後上攻門一樣好有殺傷力﹗
基奧特抖3個月都唔驚

比錫達斯買入前鋒丹巴巴亞真係醒到震，呢位29歲塞內加爾前鋒一嚟到即瘋狂入波，喺上圈次回合鬥飛燕諾食出「大三元」，上場對阿仙奴更弗到一開波就喺中圈笠射中楣，雖然入唔到波有啲冇運，但就睇到佢勁有信心，比錫達斯今場唔會玩死守，因為要先攞作客入球先有出線機會，要入波就要靠呢位熟悉阿仙奴嘅車路士棄將喇，捧大盤啦！