熱刺「讓主」冇素講

猪拉多纳

熱刺上季瘋狂掃貨，但蘇爾達杜、拉美拿等都因為表現唔掂被譏為水貨。好在佢哋今季表現回勇，有力喺今晚歐霸盃附加賽次回合，助熱刺主場殺敗AEL利馬素洗刷污名，一於撐1.5倍「讓主」。

（開賽時間：周五凌晨2:45）
AEL利馬素作客難捱

首回合先失守嘅熱刺，憑後備上陣嘅拉美拿交出兩個助攻反勝2:1，呢間倫敦球會今季唔再盲目擴軍，班人夾慣夾熟自然有利發揮。上季被視為水貨嘅拉美拿今季逐漸上力，繼首回合做救世主後，上場聯賽對昆士柏流浪又交出兩次助攻，今晚隨時再騷哥利。就算熱刺今晚收起部分主力，都仲有喺首回合建功嘅蘇爾達杜掛帥，況且呢班波連贏7場狀態Fit到漏，AEL利馬素好難同佢哋作對。

塞浦路斯足球有幾多料大家心照，AEL利馬素喺主場仲叫做有得搏吓，嚟到倫敦隨時任人魚肉。7年前嘅歐霸盃，另一隊塞軍代表安羅科薩斯作客熱刺曾慘敗1:6，就算當地足球水平真係進步神速，AEL利馬素可以輸少一半，都夠晒開「讓主」啦！