曼聯由頭W到尾

猪拉多纳

飛一「般」天使 救魔鬼上天堂

啱啱以破英超轉會費紀錄加盟曼聯嘅阿根廷飛翼迪馬利亞，今晚好大機會喺聯賽早場作客般尼作處子登場。由於紅魔開季至今仲未開齋，周中英聯盃慘敗更令主帥尹戈爾備受壓力，呢位「天使」來投正好係及時雨，隊長朗尼重臨凶地亦希望還以顏色，適逢弱旅般尼仲未適應英超節奏，求勝心切嘅曼聯一定會由頭攻到尾，相信今場係時候開齋，嫌客W太熱冇肉食，不如諗諗半場勝同「客客」啦！

（now 621周六晚7時45分直播）
萬能中場激活三叉戟

曼聯開季兩場聯賽對住史雲斯同新特蘭兩支中型班都贏唔到，周中仲喺英聯盃更慘吞英甲仔米爾頓凱恩斯4蛋，羞家之餘又遭全球魔粉圍插，新帥尹戈爾承受巨大壓力，佢深明極需要一場勝仗嚟挽回頹勢，痛定思痛下周中勁掟5,970萬鎊轉會費，成功從皇馬簽入阿根廷飛翼迪馬利亞，打破埋2011年費蘭度托利斯轉投車仔時嘅英超紀錄，仲連件招牌7號波衫畀埋佢着，可見曼聯上下對呢位「天使」係何等寄予厚望。

由於迪馬利亞持有歐盟護照，所以佢仲快過同胞馬高斯盧祖完成註冊手續，今仗作客般尼極有機會披甲。呢位「天使之翼」既能於邊路快放，上季喺皇馬更被安排踢三中場，其瞻前顧後嘅踢法儼如發電機，能適應433、343或352等多種陣式，加上佢一開波即入局嘅搶韁鬥心，相信可激活一班沉睡嘅隊友打爭氣波，而曼聯嘅「進攻三叉戟」朗尼、尹佩斯同桑馬達多咗呢位新7仔支援，入球能力必會再升呢，今場唔贏波開齋仲等幾時先？
般尼跟唔上英超節奏

記得5年前曼聯同樣喺8月作客以0比1輸畀剛升班嘅般尼，當時朗尼「餚底」唔敢操刀極刑，累卡域克孭鑊射失，依家重臨凶地嘅「魔童」已榮升隊長，球隊處於困境更需要佢挺身而出。

況且今季重返英超嘅般尼實力平平之餘，開季連盃賽已經連輸3場，士氣曳到冇朋友，首仗對車路士領先之下頻頻斷纜，完半場前竟然輸番3粒，證明佢哋面對英超球隊偏快嘅進攻節奏勁唔適應，曼聯以快打慢隨時可早早奠勝，半場客勝好路，另敲埋紅魔由頭贏到尾嘅客客亦係好路。