球迷填氹仲有排執 樸茅受讓都唔要

猪拉多纳

大家仲記唔記得樸茨茅夫呢？佢哋曾經有過輝煌一頁，可惜因財政問題不斷降班嘅「樸茅」，依家淪落到要踢英乙，令人唏噓。佢哋今晚作客開季五戰四勝嘅榜首球隊伯頓，「樸茅」睇嚟都係捱打居多，伯頓讓平半，上盤咪走寶。

（TVB 301周日晚7時15分直播）

有留意開英超嘅朋友相信都記得樸茨茅夫曾係一支實力不俗嘅球隊，當年陣中有多位英格蘭國腳，包括格連莊臣、迪科爾、高治、蘇甘保等球星，最威水係07-08球季，當時佢哋贏咗足總盃冠軍，不過呢啲都係那些年往事。「樸茅」隨後遇上嚴重嘅債務危機，喺幾年間由英超連跌三級撻落英乙，去到上年四月，球會終於重現曙光，一班「樸茅」忠心粉絲經過多年努力，成功接管球會，「樸茅」正式脫離財務監管，有望重新開始。
伯頓主場波贏晒

不過羅馬非一日建成，「樸茅」呢幾年元氣大傷，相信要經過一段長時間先可以重拾佳績，今場作客伯頓唔易打，皆因伯頓主場威力強勁，今季聯賽、盃賽主場賽事全部贏晒，中場大將羅比華亞更成功打甩上場紅牌，今場可以上陣，伯頓有晒地利、人和，上盤咪錯過。