日耳曼兵炒格捧讓主

猪拉多纳

星級中場超班[-2]綽綽有餘

世盃踢完冇幾耐啫，話咁快又開始踢歐國盃外圍賽，仲要一踢就踢3日添！新任世界冠軍德國之前連贏巴西同阿根廷封王，今晚外圍賽對住唔入流嘅蘇格蘭，主場出擊又點會甩拖？雖然中鋒馬里奧高美斯唔知幾時先搵得番對射門鞋，好在馬里奧葛斯、馬高列奧斯等頂級攻擊球員組成嘅星級中場超晒班，夠晒本錢玩殘由英超下游球隊球員組成嘅蘇格蘭防線，[-2]都捧2.02倍「讓主」！

（有線61及201周一凌晨2:45直播）

德國足球過去10年進步神速，超級新星出完一個又一個，所以就算拿姆、梅迪薩卡同高路斯等老將退役，教練勒夫都唔憂冇人用。睇番依家德國球員嘅年齡層，奧斯爾、湯馬士梅拿、卻奧斯、曉姆斯、舒賀爾尼同馬高列奧斯等等主力，全部介乎23至25歲之間，未來幾年先係佢哋嘅黃金時間！
蘇格蘭「二流防線」難捱

今屆歐國盃外圍賽德國身處D組，同組得愛爾蘭同波蘭較有實力，要出線Easy執啦！雖然奧斯爾、基迪拉同舒韋恩史迪加受傷缺陣，而且中鋒位焗用失機多過食飯嘅「倒米壽星」馬里奧高美斯，好在「日耳曼兵團」勝在中場大把猛將後上支援，更何況上周中熱身賽2:4輸畀阿根廷已經敲響警號，今場打醒精神，蘇格蘭都幾難偷雞。

蘇格蘭對上一次出席大賽決賽周，已經要追溯至98世界盃，呢支國家隊最弊係青訓唔掂冇人接到班，喺英超中、下游球隊落到班嘅球員已經算叻仔，成Team人唯一擔得起大旗嘅只有愛華頓前鋒賴史密夫，加上防線由効力葉士域治、白禮頓同打比郡等次級球隊嘅球員組成，點頂得住德國先？
頂占筍盤：德國（讓球主勝）