史特加攻守曳 多蒙特有計

猪拉多纳

多蒙特今季一直受傷兵問題影響，今晚德甲返到主場迎戰史特加，連中場米希達利恩都傷埋，可用之人所餘無幾，搞到連復操冇耐嘅根度簡亦要趕住復出，好在對手史特加今季表現曳到飛起，「蜜蜂兵團」讓波應冇難度，1.76倍「讓主」撐得過。

（有線61及201、中央5台周四凌晨2:00直播）
傷兵成籮 根度簡提前復出

「蜜蜂兵團」上季成堆傷兵，搞到表現麻麻，估唔到今季情況仲慘，馬高列奧斯、紐尼沙軒、巴拉斯塞高斯基、基治同基爾個個主力球員都做晒「十字軍」，好波之人米希達利恩喺上場0:2不敵緬恩斯場波賽後，更發現骨折要抖1個月，真係黑過墨斗，搞到依家已經冇乜人可以用，中場要靠晒鳥倦知還嘅香川真司外，可能要焗住出番已經14個月冇出過場嘅根度簡。儘管教練高普話明非必要時，都唔會要求已經操番兩個禮拜嘅根度簡趕住復出，但依家真係「多蒙特無大將，根度簡焗住出」！

雖然多蒙特聽落好似好唔掂，但佢哋對手史特加仲曳！除咗開季摸和慕遜加柏外，已經連輸3場兼只入得1球，完全係攻不強、守不穩。主場出擊嘅多蒙特，就算唔齊腳都應可全取3分。