日本女足超班 夠炒疲兵越南

猪拉多纳

另一場女亞足4強賽事，由越南迎戰日本。日本女足喺亞運可以話係大超班，最近3場波都最少贏對手3球或以上，今仗面對實力唔強加上8強賽苦戰先晉級嘅越南女足，有望「大炒」對手晉級，讓球客勝值得捧場。

（有線61及201台周一下午4時直播）

日本女足自分組賽首仗打和中國後，之後每場都大開殺戒，3仗合共攻入對手24球而且1球不失，球隊實力可以話係大超班。日本女足前鋒菅澤優衣香及中場阪口夢穗喺今屆賽事同樣入咗4球，係陣中嘅首席射手，而中場川澄奈穗美及另一前鋒吉良知夏亦分別有3球進帳，球隊得分點甚多令人感到非常恐怖，今仗面對實力一般嘅越南，相信都係「大炒格」。

越南女足上仗喺落後下憑阮氏柳同阮氏雪蓉嘅入球反勝泰國女足晉級，但球隊喺呢場波可以話係陷入苦戰。相比日本女足輕描淡寫咁擊敗中國香港女足，越南女足喺嗰場波消耗嘅體力一定唔少，今仗未必咁快回得切氣，面對實力強勁嘅日本女足相信都係凶多吉少，阿謙睇好「大和撫子」可以輕取對手勇闖決賽。