首爾大巴細頂流浪者

猪拉多纳

亞冠盃四強次回合，澳職球隊西悉尼流浪者返到主場迎戰南韓嘅FC首爾，流浪者首回合成功保住不失，同FC首爾打和0比0，今場有主場之利，出線佔上風；不過FC首爾明知形勢對佢哋不利，當然會踢得保守，首要係立於不敗之地，再搵機會偷雞，今場細盤更值捧場。

（now 670周三下午5時30分直播）

西悉尼流浪者今場雖然有前鋒杜米祖歷、辛達利比，以及後衞沙朗高爾呢三大主力刑滿復出，但係澳職仲未開鑼，球員狀態成疑，想攻都力不從心，而且若然畀對手取得作客入球就極度麻煩，相信流浪者今仗都唔敢谷得太上，以免後防空虛。

至於FC首爾前鋒尹日祿被南韓U23徵召，攻力進一步削弱，睇怕今場會專心一意「泊大巴」大打死守戰術，再從突擊博爆冷，加上FC首爾呢隊波防守一向穩陣，近八場有五場力保持不失，呢架首爾「大巴」絕對唔易破，一於捧入球細喇！