熱刺-1比都唔要

猪拉多纳

瘋狂輪換陣容大執位

輪換大師搵到接班人喇！賓尼迪斯以往執教利物浦，輪換輪到出神入化，結果搞到「紅軍」充滿海鮮味，而佢嘅「接班人」熱刺領隊普捷天奴，更係輪換輪到走火入魔，刻意排出兩隊球員出戰英超同歐霸盃，但下場同「肥賓」一樣，畀球迷插到飛起。輪換唔單止令熱刺球員狀態飄忽，更激唔起大軍鬥志，今晚熱刺喺歐霸盃C組主場迎戰土超勁旅比錫達斯，一班冇得踢英超嘅副選又再上場，梗係捧受讓嘅比錫達斯啦！

（有線61及201台周五凌晨3時05分直播）

輪換唔係一種容易駕馭嘅戰術，輪換雖然可以令每位球員都有上陣機會，保持競爭力，亦可令球員得到充分休息，不過亦有可能影響球員嘅狀態，球員道火好難Keep得好。

熱刺領隊普捷天奴使出嘅輪換戰術更係極端到走火入魔，踢英超同踢歐霸完全派出兩套陣容，簡直係互不相干，喺歐霸踢得好嘅球員鮮有機會喺英超正選上陣，喺聯賽踢得差嘅亦唔會被貶去踢歐霸，正宗係「做又三十六，唔做又三十六」，球員hea住過日辰，仲邊有鬥志吖。

普帥今場好大機會派遣上場英超鬥阿仙奴長坐冷板嘅球員上陣，呢班兵士氣差又夾得少，毫無默契可言，想贏都幾難。
比錫達斯攻守兼備

球迷應該仲記得阿仙奴喺歐聯附加賽，兩回合對比錫達斯贏得有幾辛苦，呢隊波堅唔係「省油的燈」，踢法一向夠晒硬淨，而且防守力強，前面又有熟悉英超球隊嘅丹巴巴亞攻堅，絕對攻又得守又得，有邊隊敢睇小比錫達斯就真係超錯，識捧就梗係捧讓球客勝啦！