車仔爆廠勢不可擋

猪拉多纳

莫連奴剋住雲格 法比仔絕情倒戈

今晚英超上演藍紅倫敦打吡戰，由一哥車路士坐鎮主場硬撼阿仙奴。雖然阿仙奴剛於歐聯大捷氣勢正盛，但主帥雲格撞正一生最大凶星莫連奴，後者帶領車仔，從來未輸過畀「兵工廠」，強勁數據堅過石堅，正一格食格，況且倒戈嘅「新車手」法比加斯不斷被「廠粉」辱罵，已到臨界點，今仗絕情倒戈冇面畀，阿仙奴好難頂得住，車仔主勝有買趁早。

（now 621周日晚9時05分直播）
阿仙奴喜攻 易輸反擊

阿仙奴主帥雲格上季挾住帶隊第1,000場嘅大喜日子，作客來到史丹福橋球場卻被車仔搞寸Party，唔單止慘吞6蛋，遭受奇恥大辱，仲發生球證認錯基蘭基比斯係阿歷士張伯倫，以紅牌將前者驅逐出場嘅鬧劇。今仗情況有啲相似，阿仙奴啱啱喺歐聯大勝加拉塔沙雷四個一皮，慶祝「教授」雲格入主18周年紀念，喜氣洋洋再訪史丹福橋，眾將梗係想用贏波為「教授」贈興兼報番上季慘敗之辱。

不過，兵工廠想贏真係唔容易，雲格遇上命中注定嘅凶星莫連奴。翻查紀錄，雖然雲格近年都贏過由史高拉利、安察洛堤、保亞斯等名帥帶領嘅車仔，偏偏撞正「寸王」莫連奴就冇晒辦法，呢對冤家過去曾經交手過11次，莫帥取得6勝5和未輸過嘅佳績，數據非常堅挺。點解「寸王」咁有計？只因雲格太過重視進攻，上季作客天真到只出單防中，正中擅打反擊嘅莫帥下懷，結果阿仙奴次次都畀車仔嘅瘋狂逼搶打到有氣冇碇抖，因此佢被「寸王」剋住唔係偶然。
西班牙孖寶 弗到漏油

更何況車仔今季唔單止簽入「入球機器」迪亞高哥斯達，仲羅致埋前阿仙奴隊長法比加斯，佢今夏被迫上「車」，即刻被「廠粉」摷番佢4年前喺Twitter講過「如果我轉投車仔嘅話，你可以殺死我」嘅誓言，仲笑佢髮線向上移慘變馬斯真蘭奴。法比仔受咗咁大冤屈仍保持最大嘅克制，因為佢知道最佳還擊方法，就係倒戈舊東家時騷哥利。

事實上，呢位西班牙中場今季6仗聯賽已交出6次助攻，狀態弗到冇朋友。加上法比仔太了解恩師雲格，當阿仙奴心雄大舉進攻之際，正好造就空間畀法比仔策動反擊，況且在阿迪達及艾朗藍斯倦勤下，無論用辛迪卡索拉定韋舒亞夥拍法米尼打防中，都好難起到屏障作用。既然車仔瓣瓣食住阿仙奴，主勝有1.56倍乃不二之選。