讓球客勝愛得過

猪拉多纳

英格蘭最叻恰弱隊

「三獅軍團」英格蘭上場喺歐國盃外圍賽E組大炒魚腩部隊聖馬力諾5蛋，「頹獅」又試畀傳媒吹捧為「雄獅」。究竟「頹獅」幾時會甦醒成為「雄獅」呢？就係見到脆弱獵物之時。英格蘭呢隊波其實真係冇嘢叻，最叻就係大蝦細恰弱旅，今晚英軍作客又試對住另一支弱隊愛沙尼亞，一於繼續撐「雄獅」讓球客勝﹗

（有線61及64台周一凌晨零時直播）

英格蘭近呢幾年喺國際大賽嘅成績慘不忍睹，對上兩屆世界盃都有災難性演出，兩年前嘅歐國盃亦不值一提。我哋成日都話「三獅軍團」雷聲大、雨點小，佢哋往往喺外圍賽係威係勢，聲大大話「雄獅強勢回歸」，但去到大賽就變番「頹獅」，完全冇料到。梗係啦！外圍賽弱隊多吖嘛，素來欺善怕惡嘅英格蘭梗係可以喺外圍賽蝦蝦霸霸，要Show畀人睇佢哋依然係世界級勁旅，今場作客弱旅愛沙尼亞，又係佢哋攞威之時。
愛沙尼亞唔夠班

以波論波，一眾「三獅兵」質素又確係高過對手，中場線有利物浦三子佐敦軒達臣、拉爾拉拿同史達寧，加埋上場嘅MVP韋舒亞，技術唔夠都有活力搭夠，前線就有大勇嘅韋碧克拍住朗尼，「韋大帝」嚟到阿仙奴踢番正前鋒，即刻入球率大增，信心亦返晒嚟，面對班次未夠，又有後衞卡拉斯達坐波監嘅愛沙尼亞，有望延續佳態，士哥停不了﹗英格蘭對上兩次對賽都贏愛沙尼亞3比0，今場讓球客勝值捧！