曼城絕地搶W 反轉莫斯科

猪拉多纳

保出線希望 當決賽咁踢！

英超冠軍曼城踢歐聯成績遠遠唔及聯賽，過去3屆頭兩屆都喺分組賽出局，上年就16強止步，今屆踢咗兩場分組賽又係攞得1分，不過，我認為曼城已經開始步入正軌，今晚第3輪分組賽作客E組實力最弱嘅莫斯科中央陸軍，為咗保住出線希望，肯定要當決賽咁踢，熱捧1.48倍客勝！

（有線61、64、201及203周三凌晨0:00直播）

講真，曼城踢歐聯戰績唔理想，同佢哋成日被抽入死亡之組有關，不過上年呢班波已經明顯有進步，而且阿古路、耶耶托尼、大衞施華等巨星個個身經百戰，唔通你話佢哋唔習慣踢歐聯咩？曼城頭兩場分組賽輸畀拜仁同打和羅馬都令人失望，所以嚟緊一連兩場硬撼莫斯科中央陸軍，呢6分實在不容有失。
上屆歐聯對賽贏晒

上屆曼城作客莫斯科中央陸軍贏2:1，之後主場大炒5:2，輕輕鬆鬆攞晒6分，兩隊實力明顯有一定差距。事實上，呢支俄羅斯球隊今屆頭兩場又係輸晒，畀羅馬狂數嗰場波更凸顯佢哋根本未夠班踢歐聯，曼城要贏波係機會喇！

係，莫斯科中央陸軍雖然有迪沙高耶夫、艾堅菲夫等俄羅斯國腳壓陣，啱啱喺俄超助陸軍大炒古賓6蛋兼梅開二度嘅射手阿密特穆沙，賽前仲喺記者會度牙擦擦咁話有信心入到曼城波添，但查實陸軍係咪咁有料呢？占仔覺得唔係囉。
陸軍閉門作賽冇威力

以往豪門最驚去俄羅斯作客，就係因為主場球迷「招呼周到」，佢哋啲瘋狂同熱情表現，令主隊好似踢多個人咁！不過唔好彩，莫斯科中央陸軍因為球迷涉種族歧視，畀歐洲足協罰3場歐聯閉門作賽，家陣連「第12人」都冇埋，就算巴西右閘馬里奧費南迪斯右手冇骨折可以落場，睇怕都唔係「藍月亮」對手。
Data King：阿古路恰死陸軍

‧莫斯科中央陸軍近6場歐聯全部輸晒。

‧曼城上屆歐聯分組賽鬥中央陸軍，箭頭阿古路兩循環都梅開二度。

‧「藍月亮」今季作客半場從未落後，開出2次「半贏」及3次「半和」。
盤路解碼

莫斯科中央陸軍近8場歐聯開出7大1細，入球大比率高達88%。

頂占筍盤：曼城（客勝）

有線球彩台主持阿占

電郵：soccer64@cabletv.com.hk

面書球彩專頁：http://fb.com/icable64

PHONE波熱線：1831 678

「球彩直播室」開放時間：晚上11:45至深夜4:45