豆腐防線 點擋C朗？紅軍頂艦隊唔順

猪拉多纳

「無懼世事變改，還是愈難愈愛」，雖然利物浦今季表現唔掂，但科娜「還是愈難愈愛」，愛「紅軍」嘅心永遠不變。不過，我亦唔可以盲撐利物浦而對唔住《東方波經》嘅廣大讀者，今晚「紅軍」會喺歐聯B組主場迎戰西甲班霸皇家馬德里，好明顯「紅軍」嘅豆腐防線連QPR都守唔到，又點可以擋到火力恐怖嘅皇馬鋒線呀？科娜不得不承認，皇馬今場贏波好正常，1.7倍客W係理性選擇。

（有線61及201台周四凌晨2時45分直播）

雖然已講咗好多次利物浦今季嘅問題所在，但科娜仍然係愛之深責之切，唔鬧唔得，「紅軍」喺羅渣士領軍下，防守長期曳爆，買咗幾多後防球員、差唔多換晒成條防線，問題由始至終都未有解決到，上場面對攻力疲弱嘅昆士柏流浪（QPR），對住一對二線尾嘅箭頭查理柯士甸同森莫亞，條防線都可以畀佢哋玩殘，今場對手係星光熠熠嘅「銀河艦隊」，係擁有多位世界級攻擊球員嘅皇馬，最強攻力對最弱防守，「紅軍」今場冇得打﹗
皇馬冇巴利無損火力

唔講防守講進攻，利物浦同樣係唔掂，冇咗受傷嘅史杜列治，旨意「腦殘」巴洛迪利入波真係蛇都死，上場對住大大個空門都可以炒飛機，真係Nothing is impossible﹗今季「紅軍」所有賽事加埋只入得17球，但皇馬單單C朗拿度一個已經入咗19球，所以唔好話科娜悲觀，「紅軍」今場喺攻守兩面都冇把握喺皇馬身上攞分，仲講「紅軍」對上3次贏晒皇馬？我只能講一句，今時唔同往日嘞！

皇馬今場雖然有加里夫巴利因傷缺陣，預料由艾斯高頂上，但「銀河艦隊」冇咗「大聖爺」又使乜驚呀，咁多猛人，冇咗巴利最多咪贏少啲！好多人都話皇馬可能會為咗周末場「西班牙國家打吡」而留力，但我相信已經錄得7連勝嘅皇馬唔會為咗咁而打斷自己道氣，寧願喺今場早段發力，快手快腳入波結束呢場比賽，好過贏唔到影響士氣吖。況且「銀河艦隊」喺B組有6分喺手，贏埋呢場差唔多穩奪出線權，梗係3分袋住先啦，費事留有後患吖嘛，今場客勝竟然仲有1.7倍咁和味，唔捧唔得啦！