般尼茅夫西布朗大駁火

猪拉多纳

同晚另一支近況唔曳嘅西布朗，則喺英聯盃16強作客英冠仔般尼茅夫。講開西布朗，梗係唔少得盛傳被利物浦睇中嘅比拉希奴，呢位以往踢開翼鋒嘅21歲小將，今季被改造打箭頭即刻升呢，唔單止喺聯賽入咗7球位居射手榜第3，亦係暫時最多士哥嘅英格蘭球員，計埋上圈英聯盃淘汰侯城，比拉希奴已經連續5場正式比賽有進帳，腳風順到冇朋友。不過，西布朗續有中場莊拿斯奧臣同後衞施維斯達華利拿養傷，搞到佢哋近3仗都有失波，適逢英冠四哥般尼茅夫啱啱豪贈伯明翰8蛋，以佩尤、比列比文、哥林威爾遜組成嘅三叉戟，火力唔嘢小，雙方鬥攻下轉玩大盤更穩陣。

（TVB 302周三凌晨3時45分直播）