達拉斯 海灣者大晒冷

猪拉多纳

改賽制鼓吹進攻足球

打咗咁多日美職季後賽，終於輪到常規賽盟主西雅圖海灣者出場，佢哋會喺西岸4強首回合作客FC達拉斯，海灣者呢隊波踢法有前冇後，前面入波依絲執，後面失波就慌失失，再加上今年季後賽加咗作客入球優惠條例，更有理由相信海灣者會全力搶攻，贏唔到都會爭取多啲作客入球，大家唔使諗咁多嘞，一於捧大啦！

（TVB 302周一早上10時直播）

以往美職季後賽嘅主客兩回合制係唔計作客入球優惠，踢完兩回合打和會加時30分鐘，再和就互射12碼決勝負，不過今年賽會跟足歐洲嘅盃賽賽制，兩回合打和就睇邊隊入得多啲作客入球，再一樣先加時分勝負。賽會加入呢條條例嘅原意就係想客隊更加大膽進攻，唔好作客就玩龜縮死守，等球迷可以睇到一場場充滿娛樂性嘅入球騷。

兩軍主攻防守麻麻

有咗呢條新例，為取得更多作客入球增加晉級機會，崇尚進攻兼擁有馬田斯同丹普西兩大超班射手嘅海灣者更加肆無忌憚搶攻，唔使縛手縛腳要等次回合返主場先踢進攻足球。再者海灣者貴為常規賽一哥，攻力自然有番咁上下，總共入咗65球，只係比次席嘅洛杉磯銀河少，但同時佢哋嘅失波亦係頭七隊中最多，證明呢隊波真係有前冇後。

FC達拉斯其實都係攻強守弱嘅球隊，只計常規賽主場入波甚至仲多過海灣者，17場主場賽事入咗33球，遇着掛住進攻而搞到後防空虛嘅海灣者，兩隊波入波機會相信會多的是。