勁好友4班好世界

不死鸟

跑馬跑實力係毋庸置疑，但假如年幼馬有實力，但成熟不足亦會無補於事難即時贏馬，而到牠成熟後必會恃質凌人贏到你唔信，今日所講的「勁好友」（上圖），筆者認為此駒係匹實力強勁馬，上季作戰多仗未能交出頭馬，就係欠成熟所致，預計此匹質高佳駟新季踏入4歲，成熟躍進後必可大放異采。
「勁好友」上季初出跑田草1200米，已見幕後有晒信心飛搏殺，臨場只得3.9倍開跑，可惜最後僅以鼻位之差不敵「京樂飛翔」得第二，但陣中走勢相當悅目。睇番賽前準備工夫已做足，又拍跳又試大閘，操了很久才上陣，可謂人事已經做盡，落敗係輸在成熟不足，原因牠只是3歲，而擊敗牠的對手「京樂飛翔」已4歲。而「勁好友」再出增程跑1400米，該仗「覓得寶」在前拉快步速，對於3歲的「勁好友」甚蝕底，年幼馬經驗尚淺，初跑這麼長的路程，跟得上大隊已耗上不少體力，何況更要負129磅，但牠仍能跟得十分從容，直路發力衝刺，越追越勁，最後輸個半馬位得第四，末段締23秒38時間是全場之冠，雖則三甲不入，但又一次顯露非凡實力。而牠第三仗上陣輸畀「雄心馬主」，之後「雄心馬主」再贏多兩場包括在3班賽成為4捷馬。
由此可見，「勁好友」現評57分居4班佔盡上風，今季成熟及進度理想，呢匹高質佳駟必可扶搖直上，值得追捧。