新蝦王無入錯貨

不死鸟

以前一見「蝦王」就知馬主係劉錫康，依家佢個仔同細佬都有養馬，「蝦王」系列後台就更加硬淨，本文主角K316「新蝦王」正是劉生位公子首匹名下馬，而且唔揀名牌，反而支持中型班苗禮德馬房；馬匹響新西蘭只跑過兩次，初出在軟地上贏1200米70分賽事，繼而進軍1400米二級賽，初時守住三、四位，轉入直路已無力抗衝，14駒競逐跑第十二，賽前賠率50倍早已反映機會渺茫。
血緣方面，其父Storm Creek出自北美名種「景風貓」，曾4捷於1200至1700米，包括三級賽，97年開始當種馬，首批子嗣有匹馬女贏一級賽，04年轉到新西蘭配種，「新蝦王」係首年產品，較早時亦有「箭步」來港，4戰大敗全無戰鬥能力。母親出自Kaapstad，與「安畋」份屬半姐弟，首胎誕下「新蝦王」，按其一出贏70分賽事，等同香港一場3班弱組賽事，現評67分計數唔會蝕底，外地既贏過軟地，老豆又係美國種，有可能是草泥雙槍將，令馬房部署更有彈性，來季4歲步入成熟期，應該很快有頭馬見面。