馬體會雙煞 聯手劏拉科

猪拉多纳

（日）6 馬德里體育會 Vs 拉科魯尼亞

馬德里體育會今日喺地頭恭候拉科魯尼亞，馬體會質素贏幾條街，足智彩開到「-2」，照捧2.4倍「讓主」！

（now632台周日晚7:00直播）

馬體會今季主場惡到爆，連埋歐聯、西甲同西超盃10戰9勝1和未輸過，鋒線拍檔文迪蘇傑同基沙文弗到漏，聯手貢獻咗9個士哥，今場佢哋繼續孭飛搏殺，入波易過借火。

拉科人腳本身已經削，今戰仲有路爾斯法連拿、簡尼拿同盧普3名主將分別因傷停缺陣，點捧得落手呀？況且佢哋狀態又曳到爆，近9場聯賽僅得1勝不特止，之前對皇馬、西維爾兩支前列分子都輸鑊甘，今鋪造訪馬體會，似乎難逃大敗厄運。