雙紅會撐曼聯

猪拉多纳

紅魔5連勝 紅軍一沉百踩

曼聯對利物浦呢場「雙紅會」永遠都係咁好睇，縱然「紅魔鬼」冇咗將利物浦拉下「冠軍王」寶座嘅傳奇領隊費格遜、「紅軍」冇咗曼聯剋星蘇亞雷斯，今場喺奧脫福上演嘅大戰照樣會火花四濺，何況「紅軍」今場有騎呢之霸巴洛迪利傷愈隨時候命，球迷梗係要帶定花生等睇好戲喇！不過「紅軍」粉絲就要自求多福嘞，一來唔知「巴神」今場會唔會搞出個大頭佛，二來曼聯近排咁鬼死勁，「紅軍」要全身而退真係有難度，主勝捧得過！

（now 621周日晚9時30分直播）

以往一直壓住利物浦嘅曼聯，上季喺「足球天才」莫耶斯領軍下戰績沉淪，衰到連歐霸盃入場券都攞唔到，呢個時候就到利物浦大反擊，上季攞到英超亞軍，更喺聯賽雙殺「紅魔鬼」，點知嚟到今季兩軍成績又試逆轉，曼聯經歷季初低潮後，近期強勢反彈，豪取5連勝，回復勁旅本色。至於利物浦就表現令人失望，更喺歐聯分組賽出局，要淪落到踢歐霸盃。
巴神復出 「認罪」博減刑

好明顯利物浦今季咁沉主因係冇咗一個救全家嘅神鋒蘇亞雷斯，搵嚟另一「神鋒」巴洛迪利，「巴神」製造麻煩嘅功力比起「阿蘇」有過之而無不及，但對球隊嘅貢獻同「阿蘇」就冇得比！最近「巴神」又試惹上麻煩，喺社交網站發表涉嫌歧視猶太人嘅言論，畀英足總檢控，佢決定「認罪」博輕判。「巴神」未有咁快會被罰停賽，今場更有望傷愈復出，但都咪使旨意佢會大發神威，事關佢同班隊友根本唔夾，況且佢冇表現又搞出咁多大頭佛，但領隊羅渣士仍然偏袒佢，照畀佢打正選，已引起其他球員不滿，咁隊波又點會有好成績呢？
「聖基亞」遠勝「牛油手」

曼聯一對前鋒朗尼同尹佩斯就絕對值得信賴，佢兩個近排輪流發威，今場迪馬利亞因傷缺陣都冇有怕。雖然「紅魔鬼」防守都唔掂，仲傷兵滿營添，基斯史摩寧、菲爾鍾斯、勞基梳爾等都缺陣，但勝在有獲網民封為「聖基亞」嘅迪基亞，佢呢排上晒身，勁多必入球都畀佢救晒，「紅軍」龍門米洛列特呢排卻勁唔掂，甩漏多多慘變「牛油手」！曼聯狀態大勇，今場主勝可以放心捧場！