皇馬不聖無歸

猪拉多纳

稱霸世界終極一擊

「銀河艦隊」稱霸世界只差一步！今晚於摩洛哥舉行嘅世界冠軍球會盃決賽，21連勝嘅皇馬火併阿根廷勁旅聖羅倫素，王牌C朗上仗施展插花式射門唔入失威，仲被狠批唔尊重對手搞到成肚火，今遇表現麻麻嘅聖羅倫素，誓要入多幾粒，呢場亦係隊長卡斯拿斯第700次為皇馬披甲嘅里程碑，梗係要助「銀河艦隊」於世冠盃封王，就算讓球主客和要讓到兩球，斯維照撐皇馬讓球主勝。

（無綫翡翠台及TVB 13周日凌晨3時30分直播）

到底皇馬有幾弗？唔單止近21場全勝，喺今年比賽62場贏咗50場兼轟入176球，破晒西班牙球隊紀錄，淨係「BBC」鋒線賓施馬、加里夫巴利同C朗夾埋就入咗106球，非常恐怖。上仗佢哋輕取藍十字四粒，王牌C朗冇入波之餘，仲喺領先3比0嗰陣玩嘢施展Rabona（插花式）射門唔入，畀一名墨西哥記者鬧佢唔尊重對手，仲嘲笑佢係小丑添。C朗一向勁好勝，畀人咁侮辱勢係假，相信佢今仗會火力全開入多幾粒證明自己。
卡斯拿斯700場意義大

除咗C朗要攞威之外，今年屢屢出醜嘅門將卡斯拿斯，上仗勇救12碼重拾信心，今仗係佢代表皇馬第700場正式比賽，僅次於名宿魯爾（741場）及辛捷士（710場），成為球隊史上出場次數第三多嘅球員，喺咁有非一般意義嘅時刻，呢位隊長梗係想贏波捧盃贈興喇。
聖羅倫素體力輸蝕

況且聖羅倫素上仗對住業餘球隊奧克蘭，諗住可輕鬆晉級，點知於大好形勢下一度被逼和，要踢到加時先險勝對手，贏得肉酸兼輸埋體力，中場李安度拿華路及後衞佩路斯佩利因傷難上陣，頂唔住勢如破竹嘅皇馬。「銀河艦隊」仲有上仗傷出嘅中堅沙治奧拉莫斯無恙，陣容復整，要大勝一場首捧改制後嘅世冠盃冇難度，讓球主客和皇馬要讓兩球，斯維依然力撐讓球主勝。
皇馬想破世績要問埋馬體會

皇馬旺爆贏到開巷，唔經唔覺已連贏21場，要追趕巴西球隊哥列迪巴所保持嘅24連勝世界紀錄，只係差3場。不過紀錄嘅嘢愈挖愈多，近日《馬卡報》大爆真正嘅世界紀錄並非24連勝，因為喺71至72年度球季，由球王告魯夫及尼斯堅斯率領嘅荷蘭班霸阿積士，曾經喺各項賽事連贏26場，而德國球隊特雷斯登於42至43年度球季，亦試過26連勝，雖然當時德甲仲未成立。因此，皇馬若果破紀錄，起碼要贏多6場，咁蹺西盃16強佢哋撞正剛晉級嘅同市死敵馬體會，兩回合將會喺明年1月7及14日舉行，「銀河艦隊」欲締造27連捷於史冊留名，能否雙殺專做攔路虎嘅馬體會頓成關鍵。