皇馬搏殺 聖券在握

猪拉多纳

最強戰艦劍指「四冠」世冠盃王者戰爆發

世界冠軍球會盃周日凌晨上演終極對決，皇家馬德里同聖羅倫素會師摩洛哥馬拉喀什球場，競逐最高殊榮。「銀河艦隊」連勝氣勢有幾強毋須多講，但佢哋今場再贏嘅話，唔單止向最長連勝世界紀錄邁進一步，更會取得球會史上首個單年「四冠王」成就，今場鬥每逢離開阿根廷就惡唔出樣，兼夾疲兵出戰嘅聖羅倫素，讓兩球照捧皇馬1.53倍「讓主」！

（無綫翡翠台、TVB13、廣東體育及中央5台周日凌晨3:30直播）
狀態弗爆 質素超班「占士仔」有望復出

皇馬喺4強大勝藍十字4:0，沙治奧拉莫斯頭槌先拔頭籌，賓施馬楔靚位勁射破網，加里夫巴利無人看管下頭槌建功，艾斯高一個扭幾個妙射得手，加上王牌基斯坦奴朗拿度玩後踭交波同「交叉腳」射門，成班球員簡直練波咁款，狀態弗到爆，加埋睇得又踢得嘅「男神」占士洛迪古斯今場有望傷愈復出，隨時玩到聖羅倫素班後衞陀陀擰都似。

再者，「銀河艦隊」上場贏波後，唔單止將連勝場數增至21場，更打破宿敵巴塞隆拿嘅單年贏波同單年士哥最多嘅兩項西班牙球壇紀錄，佢哋嚟緊只要贏多4場，仲會刷新埋巴西球會哥列迪巴所保持嘅最長連勝世界紀錄，況且今年已經贏得西班牙盃、歐聯、歐超盃嘅皇馬，如果捧埋世冠盃嘅話，將會寫下球會史上首次單年「四冠王」歷史，試問主帥安察洛堤點會錯失呢個大好機會先！
聖羅倫素「外訪」例腳軟

對手聖羅倫素實力差皇馬幾條街唔在講，呢支以南美自由盃冠軍身份取得世冠盃參賽資格嘅隊伍，每次「外訪」都發軟蹄，整屆自由盃作客未贏過，就算世冠盃4強鬥半職業嘅奧克蘭，都要搏到加時至贏波晉級，作客腳軟程度可想而知！最弊係梅西亞、耶比斯等中後場主將年紀唔細，後者更接近四張嘢咁滯，踢足120分鐘之後，相較於皇馬有3日時間養精蓄銳，佢哋只得短短2日時間恢復，實力同體力瓣瓣輸，莫講話爆冷封王，想輸少粒都難！
Data King：「艦隊」21連勝共入79球

‧皇馬21連勝勁轟79球，平均每場入3.76球。

‧皇馬近21場勝仗中，開出19次「贏贏」。

‧近4屆世冠盃決賽，歐洲代表半場從未落後。
乜都玩錦囊：皇馬開「半大」比率達80%

皇馬贏波贏到唔識停，捧佢哋邊瓣都熱到燙手，既然係咁，不妨向大細埋手！「銀河艦隊」21連勝中有17場開出「半場大」，比率高達8成，而對上4屆世冠盃決賽亦有3場「半場大」出現，信往績嘅話一於再捧。
盤路解碼

以1.5球中位數計，近4屆世冠盃決賽有3場開出「半場大」。